Փողի միջազգային շաբաթվա առաջնորդները

Մեծ ուրախությամբ փաստում ենք, որ «Մխիթար Սեբաստացի» կրթահամալիրի ավագ դպրոց-վարժարանի 11-րդ դասարանի աշակերտուհի, Փողի միջազգային շաբաթվա կայացման, ապա նաև վերջինիս շարունակման մեջ մեծ վաստակ ունեցող Մերի Թելունցն արժանացել է կրթահամալիրի «Տիգրան Հայրապետյան» 2015թ. մրցանակին և կրթաթոշակին:

Կրթահամալիրի Տնտեսագետի ակումբի ղեկավար Արման Երանոսյանի և Մերիի մեծ ջանքների, ինչպես նաև ՀՀ կենտրոնական բանկի աջակցության շնորհիվ կրթահամալիրի և այլ հանրակրթական դպրոցների սաները մասը դարձան Երեխաների և երիտասարդների ֆինանսական միջազգային կազմակերպության (Child and Youth Finance International) կազմակերպած Փողի միջազգային շաբաթվա միջոցառումների:

Նշենք, որ ապագա տնտեսագետ Մերին 2014 թվականին մասնակցել է ՀՀ կենտրոնական բանկի կազմակերպած «Իմ ֆինանսների միամսյակ» ծրագրին: «Երբ առաջին անգամ որոշեցի խնայել» խորագրով շարադրության մրցույթում 3-րդ հորիզոնականի մրցանակակիրն է, ով խնայելու առաջին քայլերը սկսել էր մոխրագույն փղիկի տեսքով խնայատուփ նվեր ստանալուց հետո: Այժմ նա մի միջազգային միջոցառման կազմակերպիչներից է, որի այս տարվա խորագիրն է «Խնայի՛ր այսօր, ունեցի՛ր ապահով վաղվա օր» (Save today, Safe tomorrow):

ՀՀ կենտրոնական բանկը կարևորում և խրախուսում է տնտեսագիտական գիտելիքները հարստացնելուն, անձնական ֆինանսների ճիշտ կառավարմանն ուղղված այսպիսի նախաձեռնությունները, դրանով ոգևորում նաև մյուս դպրոցներին:

Աղբյուրը` ԱՅԲ ԲԵՆ ԳԻՄ ֆինանսներ